圖：星星局長呢部環保跑車，落地以嚟從來冇「跪低過」，性能非常好
電動車一般畀人感覺同「型、英、帥」大纜都扯唔埋，但鄭晴近日喺太古坊見到架型仔跑車，初時都無為意，望真啲，原來係Tesla電動跑車，再望真啲，發現正在上車嘅原來係環境局局長黃錦星。鄭晴諗諗，原來環保係可以好有型。
鄭晴見到星星局長坐環保跑車，梗係第一時間去八卦下啦，發現原來局長部「戰車」落地只係七個月，黑色車身嘅外形同局長一樣，真係低調得嚟又出眾。鄭晴查探知道，星星局長呢部環保跑車，落地以嚟從來冇「跪低過」，性能非常良好，速度夠快，上斜又夠力。
星星局長之前嘅座駕係日產電動車LEAF，雖然都係四個座位，但而家呢部Tesla車廂內籠較大，坐入去闊落好多。不過，最大唔同就係呢部續航力更強，每次叉電，「中叉」只需兩個鐘，就可行400公里，同LEAF每次叉電後可行140公里比較，行遠好多，啱曬局長周圍去視察環保設施，例如出入屯門去睇睇環保園同T．Park，行兩日先要叉一次電，唔同以前咁要日日叉。政府鼓勵用電動車，星星局長起帶頭作用，親身使用，減少碳排放，為建設綠色香港出一分力。
