今年立法會選舉多名政壇新丁湧現，其中已經自動當選嘅工聯會候任勞工界立法會議員何啟明，同參加超級議席選舉嘅民協何啟明，咁啱係「撞名兼撞樣」。工聯會何啟明尋日同鄭晴呻，好多人都搞亂佢哋身份，身為觀塘區區議員嘅佢，更不時收到深水埗區街坊「跨區」打來，查問係咪有旅行團可以報名，將彼何認錯做此何，真係令佢滴曬汗。
「工聯何」仲同鄭晴講，早於2011年已經擔任觀塘區議員；舊年區議會選舉知道深水埗有另一個何啟明之後，已經換咗副圓框眼鏡改變形象，「諗住同『民協何』個樣分番開啦，估唔到對方最近又換咗圓框眼鏡！」佢仲話有時連傳媒都搞錯佢哋個樣添，睇嚟「工聯何」要考慮換番副隱形眼鏡先得啦！
何啟明又笑住咁話，自己喺觀塘服務多年，當區居民都認得佢個樣，唔擔心自己街坊搞錯兩個人，打去深水埗區求助，又理解另一個何啟明地區經驗尚淺，市民需要多啲時間認識佢。
已報名參選超級區議會還有李慧琼、周浩鼎、王國興、陳琬琛、梁耀忠、塗謹申、鄺俊宇及關永業。
