到底拉票難啲定拋寶牒難啲？話說喺新界東競逐連任嘅民建聯陳克勤尋日就同自己團隊嘅手足一齊入大埔林村拋寶牒許願，佢哋嘅願望多籮籮，真係拋寶牒都要拋幾轉。一次、二次、三次、四次……拋到第九次……全部人嘅寶牒都已經上曬樹，得克勤一個係例外，拋到成額汗都仲未搞掂，認真陰功豬囉。到底許咩願咁高難度啊，克勤話自己嘅願望係希望九月四號立法會選舉投票日可以得到大家嘅支持。最後，喺14次努力之下，克勤嘅寶牒終於成功登陸許願樹。其實鄭晴覺得，拋寶牒同選舉拉票一樣，邊有話咁易㗎，不過好事自然係多磨，克勤嚟緊要加油啊！
克勤團隊除咗關心選舉之外，當然都好關心香港啦，佢哋除咗希望九月四號得到市民支持，仲許願希望「增加公營房屋供應」、「退休等於無憂」、「妥善處理兩地關係」、「為香港，創出路」、「改善區內交通」、「保障動物權益」及「改善鄉郊環境設施」。鄭晴喺度都拋一個寶牒先，希望許願樹一次過滿足曬克勤你哋八個願望！
鄭晴提提你，除咗克勤之外，報名參選新界東嘅仲有：葛珮帆、鄧家彪、容海恩、李梓敬、方國珊、林卓廷、楊岳橋、張超雄、范國威、侯志強、梁國雄、陳志全、麥嘉晉、廖添誠、黃琛喻、鄭家富，陳雲根、陳玉娥、李偲嫣、梁頌恆、梁金成。
