尋日人人都話要做運動，皆因呢日係「全民運動日2016」，不過只係一日做運動唔足夠㗎！因為運動係要恆常咁做嘅，好似九月立法會選舉競逐連任嘅體育、演藝、文化及出版界議員馬逢國就會每星期打乒乓波喇。
馬逢國尋日喺社交網站宣傳運動日，話大會今年以「日日運動半個鐘，齊顯活力創高峰」為活動口號，不過喺香港只有六成人表示自己有恆常嘅運動習慣，學生喺學校嘅運動時間亦好唔夠。所以，香港學生嘅體能表現，例如男生嘅手握力同心肺功能，以及女生嘅柔軟度，都差過內地、新加坡及歐洲嘅學生。馬逢國仲話，要推動全民運動，除咗舉辦類似「全民運動日2016」嘅活動外，政府亦要喺教育上配合，增加體育課時數，提升學生嘅體能喎。鄭晴提提你，立法會體育、演藝、文化及出版界候選人仲有周博賢。
