圖：「操Fit」操咗兩個月嘅Horace也按捺不住，要一展身手\大公報記者林少權攝

　　呢排里約奧運開鑼又係本港嘅全民運動日，再加上熾熱選戰，今個夏天肯定好火熱。但鄭晴有個疑問，一眾參選人是否能運動、選舉兩不誤呢？

　　參選港島區嘅民建聯副主席張國鈞（Horace）尋日喺銅鑼灣擺街站，咁啱喺正「灣仔全民運動日」活動會場隔籬。見到有市民現場玩單槓，「操Fit」操咗兩個月嘅Horace也按捺不住，要一展身手。只見佢反手拉槓，輕輕鬆鬆就做咗五下引體上升，落嚟嗰陣仲模仿體操運動員，雙手打開舉成「V」字，仲話如果唔係工作人員叫停佢，做多十下八下都唔成問題。

　　Starry心頭好係排球

　　除咗Horace之外，民建聯主席李慧琼（Starry）亦都同佢嘅「超區」參選團隊來到街站拉票，仲緊貼奧運熱潮，向一眾街坊介紹佢哋嘅心水體育項目。Starry同Horace分別揀咗排球同足球兩項大球運動作「心頭好」，因為都係欣賞當中嘅團隊合作精神。佢哋仲話，希望今次選戰都能發揮出良好嘅團隊合作，努力打出士氣，打出聲勢，以弱勝強咁話。見到兩隊嘅團隊精神咁強，鄭晴都希望佢哋可以同遠赴巴西嘅國家隊、香港隊一樣，在今個夏天交出一份滿意嘅答卷。

　　鄭晴提提你，港島區嘅候選人名單還包括：郭偉強、葉劉淑儀、許智峯、陳淑莊、鄭錦滿、羅冠聰、司馬文、王維基、沈志超、詹培忠、徐子見、何秀蘭、劉嘉鴻、黃梓謙。參選超區嘅仲有：周浩鼎、王國興、陳琬琛、梁耀忠、塗謹申、鄺俊宇、關永業、何啟明。