圖：CY話鍾意煮下嘢食，除咗會自己包水餃，亦會自製葱油餅\資料圖片

　　山東菜以濃少清多、醇厚不膩見稱，著名嘅風味菜點包括山東煎餅、長官包子、周村燒餅同盤絲餅等。不過，特首梁振英（CY）就最鍾意食山東韮菜水餃。佢日前接受《都市日報》嘅「都市會客室」專訪，仲同專訪佢嘅主持人一齊到禮賓府嘅「熱廚房」煮山東韮菜水餃添。至於被主持問到鍾唔鍾意食龍蝦呢？CY就即時話好鍾意喎。

　　政府施政有成效

　　曾多次講過自己鍾意下廚嘅CY喺專訪中仲話，自己每隔幾個月就會到廚房煮嘢食，除咗會自己包水餃之外，亦會自製葱油餅。當年喺英國留學嘅時候，間中就會同一班香港留學生搞大食會，一人負責一道菜，而佢負責包嘅水餃都好受女同學歡迎咁話。至於講到來屆特首選舉，CY就話，依家未係時候考慮連任嘅問題，但如果佢競逐連任嘅話，一定會歡迎競爭。

　　另外，CY仲提到現時特區政府嘅政策對中產同基層都有利，所以無論下一屆由邊個做特首，相信下一屆政府都唔應該脫離依家嘅政策軌跡。CY又話，今屆政府得到管治團隊、公務員支持，仲有社會嘅配合，確實做咗唔少實事，包括處理好房屋短缺問題，增加供應，令大家對政府嘅房屋政策有信心。

　　講到早前立法會審議《醫生註冊（修訂）條例草案》時，醫學界議員梁家騮獨力「拉布」拉倒有關《草案》，CY就話，香港唔係地球上唯一有政治嘅地方，特區體制同立法會表現都有佢哋嘅特殊性，而且「拉布」唔係由香港立法會發明，但喺70個議員入面，由一個議員就拉死一條咁重要、而且喺社會上得到廣泛支持嘅《草案》，喺其他地方就無見過喇！至於政改嘅問題，CY就話依家關鍵係要立法會取得共識，得到三分之二或以上嘅議員支持，不過要取得呢項共識都唔容易。

　　宴請奧數賽籌委會

　　講返食，CY尋晚發表網誌，就話尋日禮賓府宴請第57屆國際奧數競賽香港籌委會及贊助人，仲衷心感謝籌委會主席岑嘉評同各位朋友嘅努力同付出，又話今次香港隊喺109個國家同地區嘅參賽隊伍中，以三金兩銀一銅嘅佳績排名第九，刷新咗港隊歷來嘅最佳成績，真係可喜可賀。CY仲話，今屆特區政府積極推動STEM（Science, Technology, Engineering and Mathematics），即係科學、科技、工程同數學嘅教育，鼓勵學生選修有關學科。同學們喺國際奧數競賽中奪得好成績，有助同學對STEM尤其數學嘅興趣。CY講到咁開心，唔知佢哋慶祝嘅時候有冇食水餃呢？