因為七年前一句「北極人少企鵝多」，令民建聯副主席張國鈞（Horace）試過畀唔少網民惡搞。作為立法會香港島候選人嘅佢，最近喺自己嘅Facebook專頁上載咗一條競選片段花絮，分享下對呢句「金句」嘅體會，仲形容自己係「企鵝男」添。
Horace一開始就畀工作人員問到：「有北極先定有企鵝先？」佢就只係苦笑一下攤開雙手；之後工作人員再問佢係咪「成功爭取」到「北極企鵝」，Horace就答：「自此之後，我哋個個都知道，原來北極係冇企鵝，企鵝係喺南極嘅。我諗呢個都係我對香港常識界嘅一個小貢獻。」有網民就留言讚Horace，話佢識得自嘲，證明EQ夠高，叫佢要加油。
鄭晴提提你，其他立法會香港島參選名單包括：鄭錦滿、許智峯、葉劉淑儀、郭偉強、羅冠聰、司馬文、王維基、陳淑莊、沈志超、黃梓謙、劉嘉鴻、何秀蘭、詹培忠、徐子見。
