香港地一向交通繁忙，不少香港市民同遊客都經常用的士作交通工具。但係過海的士站少之有少，鄭晴有時想截車過海又可能會畀司機哥哥拒載，都咪話唔頭痛！立法會「超級區議會」候選人、工聯會王國興（興哥）尋日朝早就喺中環歷山大廈隔籬的士站實地視察，唔使兩分鐘，見到幾架的士來了又去，仲出現排隊等的士嘅人龍，真係一的難求。
興哥話，過海的士需求大，而歷山大廈的士站又喺正中環中心地帶，佢同汽車交通運輸業總工會傾過，希望政府將呢度頭三個位改成過海的士站，其他就繼續提供港島區的士服務，一次過滿足曬唔同市民嘅訴求，方便乘客又利便業界咁話。佢仲話已經去信運輸署，希望政府盡快回應。
鄭晴知道香港島而家有大約17個過海的士站，而「超區」候選人就有九個，除咗興哥，仲有：李慧琼、周浩鼎、陳琬琛、梁耀忠、塗謹申、鄺俊宇、關永業及何啟明。
