颱風「妮妲」前晚正面吹襲香江，除咗造成部分地區塌樹、水浸、山泥傾瀉，以及航班取消同延誤，好彩無引起好大嘅傷亡情況。特首梁振英（CY）尋日喺facebook就衷心感謝喺颱風期間謹守崗位嘅工作人員同緊急服務人員，全靠佢哋全力服務市民，盡量減少社會和市民嘅損失，大家嘅工作同生活都可以喺颱風過後盡快回復正常。

馮煒光鄰居大讚CY

　　CY又不忘感謝各新聞媒體喺颱風期間，唔怕風吹雨打，第一時間為市民提供消息。講開又講，鄭晴嘅一班同事同行家真係好搏命，唔好話八號風球，十號風球都照返工啊。

　　不過，正所謂「颱風無情，人間有情」，新聞統籌專員馮煒光都喺facebook分享咗一件令佢很感恩嘅事。原來佢颱風日留喺屋企，打算落商場睇下有無嘢食，點知就遇到住喺樓上嘅好心婆婆。婆婆見佢一個人住冇嘢食，就邀請佢去自己屋企食飯，仲煮咗碗愛心麵畀馮煒光，仲奉送自家製辣椒醬添！故事還有下文啊，呢位婆婆原來係特首嘅粉絲，好支持CY嘅施政，唔單止鼓勵馮煒光「好好幹」，又大讚CY嘅大仔（梁傳昕）「叻仔」，年紀輕輕就做博士。哈，睇嚟婆婆仲係傳昕嘅粉絲噃！

　　今次係香港今個夏天第一次打風，鄭晴覺得天文台一早講定幾時轉波，畀打工仔可以提早做好心理準備，都幾好啊，起碼唔會以為放全日假，忘曬形去捉精靈唔記得返工！