東涌逸東街市裝修近三個月，尋日終於重新開業。民建聯陳恒鑌（阿Ben）同周浩鼎（Holden）兩位政界「住家男」，尋日率先帶網民行街市，仲大玩「Running鼎」任務，鬥快喺街市影相捕捉番茄薯仔蘿蔔湯、節瓜魚片、洋葱豬排呢三樣「住家菜」，鄭晴見住兩個大男人喺熙來攘往嘅街市穿梭，睇嚟買餸真係難過捉精靈啊。

　　呢一邊廂，Holden好快就行勻成個街市，仲喺一個檔口就影齊曬番茄、薯仔、蘿蔔、節瓜同洋葱，認真高效率啊！另一邊嘅阿Ben就好滋油，時不時「師奶仔」上身幫市民格價，睇下邊檔菜平，儲齊兩餸一湯之餘仲附送飯後果同甜品。結果阿Ben當然慢過「Running鼎」團隊好多拍先完成任務，最後都要畀人罰坐「無影櫈」，但Holden都好有義氣咁陪阿Ben一齊罰坐。

　　兩個人仲讚新街市好旺場，唔單止有冷氣、環境衛生、商戶人潮多，暫時收貨咁話。

　　其實呢個逸東街市大玩懷舊風味，設計成50、60年代香港地街道咁款，鄭晴見到賣活雞嘅阿姐電埋個爆炸頭着喇叭褲，以為自己穿越咗去粵語殘片片場，睇嚟東涌居民日後行街買餸又多個選擇。

　　鄭晴溫馨提示：周浩鼎已報名參選立法會「超級區議會」，其他參選名單仲有李慧琼、王國興、陳琬琛、梁耀忠、塗謹申、鄺俊宇、關永業同何啟明。陳恒鑌亦已報名參選新界西，其他參選人仲有梁志祥、麥美娟、田北辰、周永勤、何君堯、尹兆堅、郭家麒、黃俊傑、馮檢基、黃潤達、朱凱迪、黃浩銘、李卓人、湯詠芝、張慧晶、高志輝、鄭松泰、中出羊子、呂智恆同鄺官穩。