圖：退休後嘅曾主席「多路線發展」，會一邊搞智庫，又會一邊表演粵曲
今屆立法會喺改革醫委會條例草案嘅吵鬧聲中結束，曾鈺成喺主席台上最後嘅發言，話真心相信議會裏面嘅每一位議員都係用梗自己嘅方式去為香港服務，同時留低咗「祝福香港，香港一定要贏」嘅肺腑之言。但原來，主席嘅臨別贈語仲有言外之音。
尋日鄭晴同一班記者行家送別主席，祝佢退休生活開開心心。主席順便解畫，原來佢當時想表達嘅，係要奉勸大家化解仇怨：「政府同建制唔好將『泛民』當做敵人，『泛民』同樣都唔好將對方當做敵人，咁樣香港先可以贏。」不過一方面剩餘嘅發言時間唔多，另一方面係當時議案拉布拉到大家都面左左，氣氛相當之差，呢番說話講出來大家都無乜可能聽得入耳，所以主席就忍口無將呢半句講埋出來。
至於退休之後嘅生活，曾主席自然會繼續發光發熱，一方面要搞智庫，同時都「多路線發展」，前日佢就同灣仔區議員周潔冰（冰姐）合作去表演粵曲添。
