圖：阿田講笑話用「田氏力牆」幫街坊頂一頂個風，等大家快啲趕返屋企\網上圖片

　　颱風「妮妲」步步進逼，成為今年第一個吹襲香港嘅八號風球。雖然天文台尋日晏晝已經預告，最快會喺響傍晚時分掛「八號波」，呼籲市民做好防風措施，留喺安全地方，但鄭晴發現部分市民對手機遊戲Pokémon GO嘅熱愛，未有因為「妮妲」襲港而減退。有網民更加話會一邊「追風」，一邊捉小精靈添。而唔少立法會選舉參選人尋日落區之餘，亦呼籲各位「小精靈訓練員」要加倍小心。

　　面對「妮妲」「到訪」香港，參選新界西嘅新民黨田北辰（阿田），尋日仍然相當勤力落區，朝早已經現身天水圍見街坊，到咗夜晚近八點就去到荃灣派傳單。阿田喺Facebook不時發出溫馨提示，呼籲市民注意安全、定時留意風暴消息，仲講笑話會用「田氏力牆」幫各位街坊頂一頂個風，等大家快啲趕返屋企，唔好掛住喺街到捉精靈同追風。

　　至於參選新界東嘅民建聯陳克勤同葛珮帆（EQ）都有喺Facebook提醒市民提防「妮妲」襲港。克勤將「妮妲」描繪成小精靈咁，然後呼籲市民要盡快返屋企，唔好留喺街上；EQ就同佢幾位參選團隊成員拍片，提提市民要做好防風措施，唔好掛住捉精靈。

　　參選「超級區議會」嘅李慧琼（Starry）團隊昨日傍晚都頂住風球到觀塘港鐵站派單張，仲有拍埋短片分享到Facebook。鄭晴聽到條片入邊風聲呼嘯，而且睇畫面真係大風到吹得Starry郁。不過佢都係企定定喺度，講嘢仲中氣十足，蓋過咗風聲添。天氣不似預期，鄭晴都要提下各位參選人注意身體啊！

　　鄭晴提提你，其他新界西參選團隊包括：陳恒鑌、梁志祥、麥美娟、何君堯、黃俊傑、馮檢基、周永勤、黃潤達、朱凱迪、郭家麒、尹兆堅、黃浩銘、李卓人、湯詠芝、張慧晶、高志輝、鄭松泰、呂智恆及鄺官穩。其他新界東參選團隊包括：鄧家彪、容海恩、李梓敬、侯志強、林卓廷、方國珊、張超雄、范國威、楊岳橋、梁國雄、陳志全、麥嘉晉、李偲嫣、廖添誠、陳雲根、陳玉娥、黃琛喻、鄭家富、李慨俠、陳國強。參選「超區」的就還有：周浩鼎、王國興、陳琬琛、梁耀忠、塗謹申、鄺俊宇、關永業、何啟明。