圖：盛智文化身古代大將軍
近期香港零售餐飲業生意淡靜，眼見市道無咩起色，諗頭多多嘅「蘭桂坊之父」盛智文最近又有新搞作，他尋日喺沙田馬場舉辦嘅「WE LIKE HK」啟動禮，鄭晴都有去捧場，見到鍾意扮鬼扮馬嘅盛智文今次化身為古代大將軍，坐住人力車出場，穿越到現代同一眾零售、旅遊和餐飲業重量級人馬，包括名廚楊貫一、周中、莎莎集團老闆郭少明等，一齊為香港打打氣咁。
設專頁畀網民介紹好去處
「盛大將軍」話，聽到唔少零售餐飲業慨嘆社會撕裂，令到整個市道氣氛都唔好，所以佢決定係Facebook成立一個「WE LIKE HK」專頁，歡迎網民在食、買、玩、睇四方面曬相出post，宣揚多啲香港美好一面，「我哋需要和諧，需要和平，我哋愛香港。」佢仲話，香港人近幾年感到迷失，但佢眼中真正嘅香港精神應該係包容和自由表達意見。
講返「WE LIKE HK」Facebook專頁，鄭睛上去望過，內容都唔錯㗎，例如介紹邊度有好嘢食，西貢行山好去處，就連近日熱爆全城嘅「Pokémon GO」小精靈情報都有，周不時仲會送優惠券添，大家捉完小精靈記得上去曬相啦！
