圖：Starry好識計數，用50蚊買完餸仲有四蚊剩 大公報記者 林良堅攝

　　星期日晨早流流，鄭晴未瞓醒就去到筲箕灣金華街街市……買餸，唔係我買，係睇人買啊。民建聯主席李慧琼（Starry）和副主席張國鈞（Horace）要嚟個街市大對決，用50蚊幫月入12000蚊嘅低收入四人家庭買夠餸煮「三餸一湯」。

　　Horace話佢十幾歲已經開始喺街市流連，因為雙親要開工，煮飯重任落喺佢身上喎，而家做律師好忙，但佢間中都有陪老婆買餸嘅。講到咁有經驗，Horace梗係率先買齊食材啦。佢使盡50蚊買到：一個絲瓜、兩個節瓜、兩隻鹹蛋、半斤通菜、10蚊魚片和15蚊豬肉。Horace話啱啱好夠做炒通菜、魚片炒絲瓜、豬肉蒸水蛋和節瓜鹹蛋湯。

Starry精打細算用剩四蚊

　　Starry就笑稱自己係「無飯煮婦」，難得下廚嘅佢用50蚊買咗三個節瓜、兩隻鹹蛋、四條蔥、三個薯仔、四隻雞蛋還有豆腐和瘦肉，湊齊「三餸一湯」，節瓜鹹蛋瘦肉湯、清蒸豆腐瘦肉、涼拌薯仔和葱花蒸雞蛋三餸，但Starry不愧是會計師，精打細算係佢強項，50蚊買完餸仲剩返四蚊買咗四隻蕉添。

　　Horace完成任務就夠快，但係Starry買到嘅種類好似更豐富，於是裁判話兩人比賽算係打和。Horace感嘆，喺傳統街市先可以完成呢項任務，如果居住嘅屋邨都係超級市場或高級街市，50蚊就真係「巧婦難為無米之炊」。

　　買完餸之後，Starry和Horace都繼續在東區落力拉票。Starry就去到酒樓以及耀東邨爭取街坊支持。Horace下午又以柴灣街市為起點，途徑漁灣邨、杏翠苑、翠灣街等，展開東區大巡遊。

　　已報名參選港島的還有：郭偉強、葉劉淑儀、許智峯、陳淑莊、鄭錦滿、羅冠聰、司馬文、王維基、沈志超、詹培忠、徐子見、何秀蘭、劉嘉鴻、黃梓謙、賴綺雯。

　　已報名參選超級區議會還有：周浩鼎、王國興、陳琬琛、梁耀忠、塗謹申、鄺俊宇、關永業、何啟明。