咦？新民黨主席葉劉淑儀做咩事擔住兩桶水嘅？原來葉太尋日朝早到咗鴨脷洲同街坊見面，好多鴨脷洲西邨街市嘅檔主向佢訴苦，話街市自今年三月開始，唔再借出水喉畀佢哋洗地，佢哋只可以每日擔幾次水返去檔口用，保持環境清潔。葉太即場試嚇擔起兩桶水（見圖），話已經覺得好重，何況係一班檔主日日要擔幾次水？難怪佢咁勞氣，要喺自己嘅Facebook專頁分享一下感受啦。
葉太話，鴨脷洲西邨街市係領展轄下，商販話檔口經常加租，但係管理質素就每況愈下，佢哋投訴咗好多年，一直都冇改善。睇唔過眼嘅葉太，即時聯絡領展嘅行政總裁黃國龍跟進事件，同對方講話領展唔可以因為商場未曾翻新、租金回報率低就唔理租戶，而今次呢件事亦會對領展嘅聲譽帶來負面影響。佢又引述黃國龍嘅回覆，話承諾會立即跟進，改善情況。鄭晴都希望街市環境能夠有所改善啦。
鄭晴提提你，葉劉淑儀已報名參選立法會選舉港島區地方選區，其他參選名單包括：張國鈞、郭偉強、許智峯、陳淑莊、鄭錦滿、羅冠聰、司馬文、王維基、詹培忠、沈志超、何秀蘭、劉嘉鴻、黃梓謙、徐子見。
