圖：有前員工大讚阿田好靚仔，有「日本型男」嘅風格 大公報記者何嘉駿攝
在新界西直選競逐連任嘅新民黨立法會議員田北辰（MT）作為連鎖服裝店老闆，有品味之餘身材亦keep得好好，65歲嘅佢仍然好charm。佢尋日去青衣做街站嘅時候，就遇到佢嘅超級粉絲商婆婆喇。今年74歲嘅商婆婆以前喺MT旗下品牌做咗17年，佢見到舊老闆即時衝上去打招呼。婆婆同鄭晴話，擔心MT日日喺街站日曬雨淋好辛苦，尋日見到MT，覺得佢氣色都幾好。婆婆仲話，以前打工嘅時候，就已經覺得MT好靚仔，有「日本型男」嘅風格哦。佢又靜雞雞咁同鄭晴講，偶像唔單止要外表吸引，仲要好有員工或者粉絲嘅心。佢話自己退休之後，仲會收到MT送嚟嘅月餅，有一次自己唔記得去攞，MT就特登搵人送上門。MT份人原來咁細心，鄭晴都忍唔住要畀對心心眼佢！
鄭晴提提你，除咗田北辰報咗名參選立法會新界西直選外，其他參選名單仲包括：梁志祥、陳恒鑌、麥美娟、周永勤、何君堯、尹兆堅、郭家麒、黃俊傑、陳浩天、馮檢基、黃潤達、朱凱迪、黃浩銘、李卓人、湯詠芝、張慧晶、高志輝、鄭松泰和中出羊子。
