圖：Starry本身都係果欄嘅熟客仔，周不時都嚟呢度買生果 李慧琼facebook圖片
呢幾日天口熱爆，唔少人都會嘆番個冰凍生果，再去海灘曬曬太陽。話說Starry（李慧琼）尋日就跑勻果欄同大浪灣，不過為嘅就唔係嘆世界，既冇買生果，又冇戲水日光浴。嚟呢兩個地方，係要做街站拉票，同街坊打招呼囉。熱辣辣都仲要周圍跑，件衫濕完又乾，乾完又濕，每日循環n次，認真陰功豬。
足跡跑勻港九新界，Starry就話，最有感情嘅都係自己第一次出道當選立法會議員嘅九龍西。佢尋日去做街站嘅時候，就落力咁同大家介紹果欄，話嗰度唔單只生果又平又靚，而且仲有好多有歷史價值嘅建築同特色。例如個別店舖仲印住大半世紀前嘅標識，連用緊嘅手推車都係「古董」，用足80幾年都仲係咁硬淨。之所以咁熟書，原來係因為Starry本身都係果欄嘅熟客仔，周不時都嚟呢度買生果「孝敬」屋企嘅囡囡同老公。雖然貴為民建聯主席，平日做嘢咁忙，對屋企嘅大小事都堅持親力親為，鄭晴真係要讚一句，Starry你認真廿四孝啊！
鄭晴喺度都要提提大家，李慧琼報咗名參選超級區議會，其他名單包括周浩鼎、王國興、陳琬琛、梁耀忠、塗謹申、鄺俊宇、關永業、何啟明。
