圖：周浩鼎拍片提醒玩Pokémon GO注意安全
Pokémon GO遊戲風靡全港，唔少市民都變成寵物小精靈訓練員，好多政商界人士都「日夜鍛煉去取勝」添。已報名參選立法會選舉「超區」界別議席嘅民建聯副主席周浩鼎（Holden），尋日就同競選團隊拍了段新片，提醒網民「捉」小精靈時要注意安全和留意禁區。咁自己又有無玩呢？Holden同鄭晴講，而家每日都好忙，要去不同區擺街站，要專心做好選舉，又話與其捉小精靈，不如幫市民收服「禍港壟斷怪」！
李秀恆要個女傳授心得
另外，廠商會會長李秀恆尋日同傳媒午宴時，都話深受小精靈熱潮吸引，好有興趣試玩，急不及待要個女傳授下遊戲心得，從事鐘表行業嘅佢又希望可以把遊戲中嘅技術結合到商業中，整啲新搞作！
鄭晴發現原來網上已經有人早着先機，推出Pokémon「捉寵專車包鐘」服務，提供WiFi，充電以及冷氣，可以令訓練員喺夏日炎炎之下涼爽咁捉盡港九新界各處嘅小精靈。真係商機處處，鄭晴點解無啲咁嘅商業頭腦啊！
鄭晴提提你，已報名參選「超區」嘅名單仲有：李慧琼、周浩鼎、王國興、陳琬琛、梁耀忠、塗謹申、鄺俊宇、關永業同何啟明。
