圖：容海恩（右）於黨友姚嘉俊一家拍全家福時「攝鏡」，自嘲老是常出現
新民黨義務法律顧問、新界東立法會參選人容海恩（Eunice），因一副甜美樣貌被譽為「法律界桂綸鎂」，「靚女大狀」去到邊自然都係鏡頭焦點，仲成日畀人「集郵」。但鄭晴發現，Eunice似乎都好鍾意做「綠葉」，佢前日就喺黨友姚嘉俊影全家福嘅時候做「攝石人」，喺人哋一家三口後方擺個勝利手勢，搶鏡程度連鄭晴都分唔清主角到底係邊個。
Eunice話，嗰日出席黨友姚嘉俊同黃嘉榮位於第一城嘅聯合辦事處開幕，見到又多個地方為社區服務，姚嘉俊一家又好開心咁影全家福，於是忍唔住「攝鏡」沾染下啲歡樂氣氛。Eunice事後仲將張相擺上網自嘲自己「老是常出現」。不過，Eunice最近又真係好勤力，又擺街站聽街坊訴求，又帶網民行書展，仲每晚喺Facebook直播「派軍糧」，講下自己生活瑣碎事，一班支持者仲晚晚準時捧場，認真「老是常出現」。
鄭晴再提下你，新界東參選名單仲有葛珮帆、陳克勤、鄧家彪、李梓敬、方國珊、林卓廷、楊岳橋、梁天琦、張超雄、范國威、侯志強、李偲嫣、麥嘉晉、梁國雄同陳志全。
