圖：Ann姐着住件粉紅色格仔恤衫好靚好招積，夠曬搶眼
話說鄭晴之前見到民建聯蔣麗芸（Ann姐）報名出選嘅時候，就覺得佢着嗰件粉紅色格仔恤衫好靚好招積，夠曬搶眼。不過最近見到佢日日落區都着呢件衫，心裏面都打個凸，心諗莫非Ann姐唔洗衫，日日着返同一件衫？尋日鄭晴忍唔住膽粗粗咁去提醒Ann姐要勤換衫，一問先知道原來佢備有兩件一樣款嘅「戰衣」，每日輪替出陣。
Ann姐又話畀鄭晴聽，呢兩件「戰衣」係年前喺外國趁有discount嘅時候入貨嘅，買咗之後連老公梁海明（Raymond）都勁讚話醒目好睇；唔怪之得Ann姐對呢套衫情有獨鍾啦。
着得咁sharp，自然都容易給各路街坊成功捕捉「野生蔣麗芸」。Ann姐尋日做街站嘅時候，就給一個伯伯捉住，伯伯好激動話唔可以畀「港獨」分子搞亂香港，講到肉緊嘅時候，伯伯更加係聲淚俱下，Ann姐都覺得好滾動。另外，Ann姐仲偶遇埋港台前知名主持李鑾輝添。
蔣麗芸已報名參選九龍西立法會選舉、其他參選名單包括梁美芬、狄志遠、譚國僑、游蕙禎、黃碧雲、劉小麗、李泳漢、朱韶洪、黃毓民及毛孟靜。
