圖：「鼠王芬」喺FB上分享自己捉「小哥達」仲話自己係「捉鼠專家」唔係「鼠中之王」

　　Go go go, Pokémon GO！等咗咁耐，尋日Pokémon GO終於正式登陸香港，鄭晴同一班同事梗係興奮到爆炸，周街搵小精靈啦。原來唔少政界中人都第一時間Download試玩。花名「鼠王芬」嘅梁美芬就喺自己FB上面分享自己捉「小哥達」嘅截圖，話到明「識捉一定係捉小哥達」。佢仲為自己「正名」，話自己花名裏面嘅「鼠王」二字係指「捉鼠專家」，而唔係「鼠中之王」，希望大家唔好再叫錯佢做「大王」咁話。「鼠王芬」又提醒一眾訓練師收服小精靈嘅時候記得要小心睇路，避免玩到太投入而發生意外。

　　除咗「鼠王芬」，民建聯張國鈞（Horace）班助理玩game之餘，仲膽粗粗咁去惡搞老細。Horace當年因為一句「北極人少企鵝多」被戲稱為「企鵝男」。佢嘅助理今次就將Horace當做小精靈咁P入捕捉畫面裏面，背景仲要係一群企鵝陪住佢企喺「門常開」下邊添。佢哋仲得戚到改埋歌仔：「Horace張，日日鍛煉去取勝……」真係好贈興呢。Horace都無嬲嬲豬啦，但佢要求：「下次改SLAMDUNK得唔得？」

　　不過，鄭晴都要提提大家，返工嘅時候唔好偷玩Pokémon GO，特別係唔好畀老細發現你偷玩，否則以後分分鐘要做「全職精靈訓練師」啊。

　　梁美芬已報名參加九龍西立法會選舉，其他名單包括民建聯蔣麗芸、新思維狄志遠、民協譚國僑、公民黨毛孟靜、青年新政游蕙禎、民主黨黃碧雲、小麗民主教室劉小麗，獨立李泳漢及朱韶洪。張國鈞已報名參加港島區立法會選舉，其他名單包括工聯會郭偉強、新民黨葉劉淑儀、民主黨許智峯、民主思路黃梓謙、公民黨陳淑莊、熱血公民鄭錦滿、香港眾志羅冠聰、獨立司馬文、王維基及沈志超。