圖：克勤向阿娘借頂涼帽嚟試戴
香港呢幾日好似個火爐咁，鄭晴就快熱到溶，各路參選人仲要喺大熱天下四出奔走，更加「攞命」，大家都想盡辦法防曬。話說克勤（民建聯陳克勤）喺大埔「洗村」嘅時候，就發現村口客家阿娘（婆婆）有傳統武器，各位觀眾，就係客家涼帽喇！身水身汗嘅克勤即刻向阿娘借頂涼帽來試戴，果然清涼十足，完全可以避開同太陽伯伯玩遊戲。佢仲自辯：「雖然係婆婆戴得多，不過都有客家男子漢戴嘅，所以唔算女人型。」不過，克勤發現，涼帽有黑紗圍邊，街坊可能會睇唔清自己個樣，為咗繼續「露面洗村」爭取支持，克勤都係將頂帽還返畀阿娘先。
陳克勤已經報名參選立法會新界東直選，其他參選名單包括民建聯葛珮帆、工聯會鄧家彪、新民黨容海恩、自由黨李梓敬、獨立方國珊、民主黨林卓廷、公民黨楊岳橋、「本土民主前線」梁天琦、工黨張超雄、新民主同盟范國威、獨立侯志強、社民連梁國雄，人民力量陳志全。
