圖：Alice變的姐，仲接咗妹頭（右）呢個乘客添

　　《墨攻Ⅱ》？《墨攻》都出續集啊？華仔有無做先？唔好意思，鄭晴搞錯咗，呢套叫《麥工Ⅱ》，係工聯會麥美娟（Alice）擔綱演出。不過，Alice今次又幾有驚喜喎。短片一開始，鏡頭影住一條陰森嘅走廊，講述Alice經過三日連續35個鐘嘅會議之後，開始出現幻覺，鄭晴仲以為睇緊《見鬼2016》啊！之後Alice一覺醒來，竟然變成的士「阿姐」。

　　一個「化行妝」嘅小妹妹就先聲奪人，「我哋上車咁耐，你就瞓足咁耐，你估而家上演緊韓劇呀？」之後妹頭就立即變返嬌嗔，向坐喺佢隔籬嘅工聯「小花」陳穎欣話，希望生日可以做botox，又希望日後搵個最貴嘅美容醫生幫佢整容喎。處理咗好多醫療事故case嘅Alice係咁提醒妹頭話，千萬唔好亂試啦！

　　呢位妹頭都好搶鏡喎，唔知係唔係專業演員呢？鄭晴問過Alice，佢話妹頭其實係其中一個同事嘅囡囡，九歲左右，喺學校有演話劇，所以拍攝嘅時候無咩點NG，「佢真係好好戲！」下星期出第二集，妹頭會唔會繼續客串呢？Alice就話第二集無妹頭，不過而家口碑唔錯，個個都讚妹頭。嚟緊妹頭可能會再出現喺第三集喎！嘩，霞姨，快啲準備個小童飯盒呀！鄭晴要繼續睇妹頭演出㗎！

　　Alice已經報名參選新界西，其他參選人還有：民建聯梁志祥、民建聯陳恒鑌、新民黨田北辰、自由黨周永勤、獨立何君堯、民主黨尹兆堅、公民黨郭家麒、青年新政黃俊傑、「香港民族黨」陳浩天、民協馮檢基、街工黃潤達、獨立朱凱迪、社民連黃浩銘。