圖：祥哥同Holden呢對「孖公仔」尋日嚟到屯門，上演咗一套街頭劇，力數反對派三大「拉布」罪狀　　大公報記者何嘉駿攝

　　參選新界西嘅民建聯立法會議員梁志祥（祥哥）同「超級區議會」參選人、民建聯副主席周浩鼎（Holden）近排成日「孖公仔」出場，遊走各區宣揚民記理念，尋日兩個人嘅團隊就嚟到屯門青河坊一帶，仲上演咗一套街頭劇，力數反對派三大「拉布」罪狀，吸引好多街坊企定定係度睇添。

　　祥哥話，新界西的醫療需要一向都好大，呢四年佢一直向政府爭取好多嘢，例如擴建屯門醫院、盡快落成天水圍醫院、喺洪水橋新發展區預留醫院用地、要求增撥醫療開支等，真係同政府Fight（爭取）到口水都乾埋。佢仲鬧因為反對派「拉布」差啲搞到所有嘢功虧一簣，擴建屯門醫院又拉、財政預算案又拉，連《醫生註冊條例草案》都「拉布」，令醫療開支差少少就被削減，而家更無法增加醫務人手，認真多得反對派唔少。

　　祥哥同Holden就「腳法凌厲」，即場示範如何將反對派三個道具踢到老遠，希望踢走議會「拉布」暴力，建設香港為港創出路。鄭晴見到好多街坊都拍曬手掌叫好，睇嚟好有共鳴哦。

　　鄭晴提提你，立法會新界西候選名單還包括民建聯陳恒鑌、工聯會麥美娟、新民黨田北辰、自由黨周永勤、獨立何君堯、朱凱迪；民主黨尹兆堅、公民黨郭家麒、青年新政黃俊傑、「香港民族黨」陳浩天、民協馮檢基、街工黃潤達及社民連黃浩銘。而區議會（第二）名單包括民建聯李慧琼、工聯會王國興、公民黨陳琬琛、街工梁耀忠、民主黨塗謹申、民主黨鄺俊宇、新民主同盟關永業、民協何啟明。