圖：柯創盛抱住「多聚會，少誤會；多溝通，實成功」理念服務市民 短片截圖
已報名參選立法會九龍東直選嘅民建聯觀塘區議員柯創盛（柯仔），佢喺尋日就上載咗段短片，喺片中佢爆料話自己曾經被人話係「死剩種」，令到佢好唔開心兼好灰添，不過，好彩當時得到班街坊力撐，同佢講，一定支持佢。究竟邊個咁冇口德，咁樣詛咒柯仔？原來件事發生喺03年區議會選舉，柯仔當年攞觀塘王，但佢啲黨友就選輸咗，有反對派就話佢係「死剩種」，講番件事佢仲有啲激動，而當時因為有成班街坊都撐佢，令佢好感動，自此佢就抱住「多聚會，少誤會；多溝通，實成功」呢個理念嚟服務市民。
柯仔喺段短片中，仲提到做咗咁多年議員，每日幾乎都係朝7晚11，實情「晨操晚練」咁話，又話自己少時屋企好窮，爸爸媽媽係清潔工人，佢都有幫父母手，一齊執垃圾，雖然係辛苦，但覺得係好好嘅回憶喎。
鄭晴又提提你，參選立法會九龍東嘅名單仲包括，民主黨胡志偉、東九龍社區關注組陳澤滔、工黨胡穗珊。
