話說一年一度城中盛事─「香港書展」前日喺灣仔會展開幕，鄭晴當然唔執輸要去行下啦。點知，畀鄭晴發現書展中，唔少鼓吹「港獨」、「公投」、「自決」等內容的書籍，又有「搞激者」的大頭相高高掛起；不過鄭晴留意到，這類書似乎吸引唔到乜人注目駐足，或多或少反映咗「港獨」其實真係得唔到市民嘅支持嘅！
鄭晴了解咗一下，貿發局就話，佢哋唔會審視作者嘅背景同主張，現時亦冇規例限制立法會參選人或候選人喺書展宣傳嘅作品喎，話時話，呢類書無乜人睇啫，但書展人來人往，有人趁機博宣傳，好似已經講明會參選，只係未報名嘅「長毛」社民連梁國雄嘅新書都放咗喺書展嘅當眼處，而「熱普城」五個參選人嘅大頭相又高高咁貼咗喺《熱血時報》招牌上。鄭晴真係不禁要問一聲：嘩！咁樣計唔計選舉廣告㗎？
