圖：曾鈺成與一班學子行書展 大公報記者李淇攝
隨住立法會會期結束，歷任兩屆立法會主席的曾鈺成將退下火線，實行唔做主席改行做「文青」。曾主席尋日就喺書展出席講座，同一班年輕人講嚇自己嘅英語人生，順便宣傳嚇自己新書《英語．人生 曾鈺成》，尋日下午仲同一班年輕學子行書展，分享嚇自己鍾意睇啲咩書添。曾主席話，自己最近好鍾意睇美國總統奧巴馬仲係做參議員時所寫嘅一本書──《無畏的希望：重申美國夢》，尤其係第四章講到政治同從政嘅理念，佢大讚好有共鳴，仲推介畀各位有志從政嘅人睇喎，真係搞到鄭晴都好好奇想知道本書講乜呀！
至於一班學子會推介番啲咩書畀曾主席睇呢？有位女同學就攞咗本講聖誕老人嘅書，話叫主席得閒回味嚇同「長毛」梁國雄一齊去芬蘭做義工嘅日子喎。曾主席就望住本書陰陰嘴笑，話長毛唔係聖誕老人，係「聖誕怪人」先啱喎。
