圖：王國興（左）拍攝短片找來鄭耀棠及「小王國興」拍攝童年回憶　　 大公報記者蔡文豪攝

　　已經宣布咗競逐立法會「超級區議會」議席嘅工聯會王國興（興哥）為勞工階層服務咗幾十年，老而彌「堅」嘅佢最近仲好潮咁拍咗好多短片解構自己，獲得好多網民激讚。興哥話畀鄭晴知，近排搞緊個「大製作」，不過今次唔係同大家講格仔衫、牛仔褲同埋講嘢點解咁大聲噃，而係憶述佢童年時嘅一段「奇遇」，同埋透露畀大家知，呢段奇遇點樣改變佢一生，令佢立志加入工會、回饋社會。而呢次仲請嚟工聯會榮譽會長鄭耀棠（棠哥），友情客串扮演改變興哥生命中嘅男人添！

　　不過，大家千祈唔好一諗起興哥，就諗得咁HEHE啊，皆因棠哥只係演一個「柴可夫」司機啫。興哥話，佢細個嗰時因為要幫爸爸睇住個小販檔，差唔多有八年時間係喺街頭露宿咁滯，而呢位佢生命中嘅「男人」──司機叔叔就係喺呢個時候認識嘅喇。興哥話，喺司機叔叔嘅幫助下，佢有書讀，接觸到工會嘅事務，睇到社會好多唔公義嘅事情，更啟發咗佢服務社會嘅決心。鄭晴見到棠哥同飾演童年興哥嘅小演員對戲，可謂入木三分，真係好想快啲睇到呢套短片製成品，一睹棠哥嘅演技啊！

　　鄭晴又提提你，區議會（第二）參選人名單還包括：公民黨陳琬琛、街工梁耀忠、民建聯李慧琼、民建聯周浩鼎、民主黨塗謹申、民主黨鄺俊宇、民協何啟明、新同盟關永業。