圖：蔣麗芸去報名競逐連任，獲贈三件「神器」 大公報記者黃洋港攝
民建聯蔣麗芸（Ann姐）四年立會生涯，憑住真性情同獅吼功，力抗議會內嘅「歪風邪氣」，被網民改咗個「元秋」嘅花名，知名度激增。尋日Ann姐去報名競逐連任，來自九龍西嘅多名民建聯區議員，就為佢送上三件「神器」，第一個係望遠鏡，寓意高瞻遠矚。第二個係耳筒，寓意耳聽八方。第三個就係大聲公啦，形容Ann姐面對「拉布」等議會惡行，都敢於「為理發聲」。嘩，「獅吼功」再加埋大聲公，咁搞法，分分鐘「拉布」嗰幾個「火雲邪神」都頂唔順哦。鄭晴又提提你，已報名參選九龍西直選嘅名單仲有經民聯梁美芬、新思維狄志遠、民協譚國僑、青年新政游蕙禎、民主黨黃碧雲、小麗民主教室劉小麗同埋報稱獨立嘅李泳漢。
