圖：阿Bill宣傳海報上做咗個「三角形手勢」，原來好有意思
立會選戰正酣，好多參選人都出盡法寶吸引市民注意。鄭晴就發現，尋日報名參選新界東嘅工聯會鄧家彪（阿Bill），宣傳海報上就做咗個「三角形手勢」。阿Bill話呢個手勢有名堂㗎，叫「Bill Up」手勢，係自己團隊創作嘅。佢話個三角手勢其實係一個家，因為新界東幾十萬打工仔，最想要嘅無非都係一個家，所以呢個手勢除咗配合團隊「爭氣！Bill Up！」口號，亦希望話畀市民聽佢對新界東嘅願景，同埋幫助市民嘅決心。
阿Bill仲大賣關子，自爆「Bill Up」手勢仲有更深層意義，但就話要保持神秘唔講得住，叫市民拭目以待。睇來呢個手勢真係神秘過魔術，鄭晴都忍唔住想大叫：「點解嘅？點解嘅？點解嘅？」
已報名參選新界東的名單還有民建聯葛珮帆、民建聯陳克勤、工聯會鄧家彪、新民黨容海恩、自由黨李梓敬、獨立方國珊、民主黨林卓廷、「本土民主前線」梁天琦、工黨張超雄、新民主同盟范國威、獨立侯志強。
