圖：阿Ben好細心用磚頭鋪路畀市民行，以免雙腳濕曬

　　嘩！鄭晴有無睇錯呀？民建聯陳恒鑌（Ben）走去拆地磚？佢唔係咁「勇武」走去學埋啲「本土派」呀？睇真啲，阿Ben真係拆磚頭喎，不過唔係掟人，而係搭一條磚頭路畀市民行，以免雙腳濕曬。

　　話說尋日荃灣荃貴街荃華街交界爆水喉，啲水不斷湧上嚟，部分路段嘅水位差唔多有波鞋咁高，咁樣行過去雙腳一定濕曬，身為當區區議員嘅阿Ben，當然第一時間到場了解。阿Ben眼見有啲磚頭因為水管爆裂而散開，於是就地取材，用磚頭砌條行人路出嚟，方便居民行過，以免佢哋雙腳濕曬。阿Ben拍咗段短片交代情況，話呢個位置已經計劃安排換水喉，但因為交通問題遲遲未能處理，稍後佢會搵有關方面傾嚇更換水喉嘅安排。鄭晴都好關心啲磚拆完點啊？阿Ben話唔使擔心，修路工人已經鋪好咗。

　　網民Wing Issac就話「親力親為，好有心」，而另一網民Mei Lo Szeto都話「支持做實事陳恒鑌，繼續努力為社區出力！」鄭晴見到阿Ben咁有心，呢啲先係做實事嘛！

　　已報名參選新界西仲有民建聯梁志祥、新民黨田北辰、自由黨周永勤、獨立何君堯、青年新政黃俊傑、「香港民族黨」陳浩天、民協馮檢基、街工黃潤達、獨立朱凱迪。