圖：原來興哥做咗十年「伙頭大將軍」
提起工聯會王國興（興哥），大家一定會諗到「日以繼夜、夜以繼日」、金光閃閃嘅抗「拉布」神器「金鉸剪」，仲有一手好書法。不過，鄭晴八到，原來興哥係「伙頭大將軍」（廚師），仲要做咗十年咁耐。話說尋日喺興哥出選「超區」嘅誓師大會，身為工聯會榮譽會長嘅鄭耀棠（棠哥）當然撐場，棠哥仲向鄭晴爆料話，當年興哥第一份工就係洋務工會嘅九龍遊樂部做「伙頭大將軍」，起初興哥咩都唔識，但後來憑住努力，興哥好專心咁學好呢門手藝，喺飯堂煮大鑊飯。到底興哥有咩拿手菜式呢？「菜膽雞，因為比較簡單，沙薑雞都得。」嘩！鄭晴聽到都流曬口水啊！
不過，棠哥話，從來未試過喺興哥屋企食到興哥嘅手藝喎！興哥就話，自從入咗立法會之後，都無時間親自下廚。部分激進派成日喺立法會「拉布」，梗係無時間啦！
已經報名參選超級區議會嘅參選人仲有民建聯李慧琼、周浩鼎，民主黨塗謹申、鄺俊宇、街工梁耀忠、民協何啟明、公民黨陳琬琛、新民主同盟關永業。
