圖：葉太上個禮拜仲去睇埋《海底奇兵2》
港產片《寒戰2》有發哥（周潤發）、城城（郭富城）等天王巨星參演，雖然上畫後嘅反應係毀譽參半，但都不失為城中熱話。繼上次點評《寒戰》後，曾經嘅「真．保安局局長」、新民黨主席葉劉淑儀再次客串影評人，用自己嘅官場經驗去獨家分析片入邊嘅錯處。
佢就點出，片中將警隊描述成獨立王國，威風八面，好似唔使將政府放喺眼內，而擔任警隊「一哥」嘅郭富城喺劇中獨斷獨行，親身上陣營救被綁架嘅太太。但現實情況中，呢種情況就冇可能發生。當然，葉太都唔係齋彈唔讚嘅，例如佢喺評論裏面就話《寒戰2》承接上集，「劇情保持一貫的緊湊與精彩」。葉太呢篇專業嘅非專業影評出街之後，成功「呃左勁多like」，有網民大讚話「真係學到嘢」。
話說葉太最近似乎特別有癮去睇戲，除左《寒戰2》之外，上個禮拜仲同個囡囡一齊去睇埋《海底奇兵2》。不過葉太早幾日已經報咗名參加立法會港島區直選，鄭晴估計來緊選戰愈來愈困身，葉太之後呢兩個月應該都冇乜機會去睇戲了。
港島區參選名單還有民建聯張國鈞、工聯會郭偉強、民主黨許智峯、熱血公民鄭錦滿。
