今屆立法會選舉好熱鬧，各區都多咗名單參選，功能組別也有好多新面孔。會計師陳弘毅作為新人首次出戰立法會會計界，佢尋日已經報名參選，前日陳弘毅開記招自我介紹嘅第一句話係：「我係會計界嘅陳弘毅，不是法律界嘅陳弘毅，我是在會計樓做嘢嘅Kenneth，不是在律師樓做嘢嘅Kenneth」。哈，真係咁啱得咁橋，陳弘毅唔單止同基本法委員會委員陳弘毅撞名，連英文名Kenneth也同現任會計界議員梁繼昌撞埋啊！
陳弘毅話畀鄭晴知，以前參加考察團時，有人睇到名單以為「陳弘毅教授來咗，點解陳弘毅教授後生咁多？」他覺得呢個也係一件好事，可以畀大家更快認識佢。
此陳弘毅非彼陳弘毅，今屆選舉還有兩個何啟明啊！工聯會觀塘區議員何啟明就會出選勞工界，咁啱民協出戰「超級議席」嘅深水埗區議員都係叫何啟明啊。
撞名都算，鄭晴仲睇到網上熱話，呢排因為有咗「美圖獸獸」神器，選舉單張仲興「撞樣」添。其實，睇過韓國小姐候選人簡介，「撞樣」呢啲嘢，你哋真係見識少啦。
報名參選會計界的還有梁繼昌；「超級議席」參選人已報名的有：民建聯李慧琼、周浩鼎，公民黨陳琬琛、街工梁耀忠、民主黨塗謹申、民協何啟明。
