圖：葉劉淑儀同田北辰買咗幾盤壽司慰勞大家／大公報記者 黃洋港攝
今屆立法會就快「煞科」，新民黨主席葉劉淑儀同副主席田北辰尋日下晝就喺立法會請傳媒「食好西」，買咗幾盤壽司慰勞大家。田北辰仲講笑話因為「怪醫」瘋狂「拉布」響鐘無時間食飯，午餐都只係食咗少少嘢，「真係好想捧埋啲壽司入去（議事廳）食。」
換屆在即，鄭晴聽講葉太同田生都積極考慮角逐連任。尋日有民調就話葉太喺港島區支持度高過曬咁多政客，新民黨隨時可以喺港島連取兩席。鄭晴攞住個民調結果問葉太，葉太就話，呢個說法太抬舉佢，認為而家社會時勢咁撕裂，邊可能有一個政黨同區攞兩席，加上新民黨港島得兩位區議員，論勢力都比其他政黨輸蝕，覺得呢個民調做得太早啦。至於民意支持同樣喺新界西排頭位嘅田北辰就覺得，新界西版圖太大，淨係計大嶼山都好多條村，新民黨只係細黨，真係要「一步一腳印」爭取支持。
