描述警隊高層權鬥電影《寒戰Ⅱ》好HIT，真係唔睇同朋友無話題啊，戲入面郭富城飾演「一哥」仲親自同匪徒駁火MAN爆。適逢「恒生銀行協助警方撲滅青少年罪行比賽2016」頒獎禮尋日舉行，真處長盧偉聰、真副處長黃志雄等警隊高層都有出席，鄭晴聽聞，唔少嘉賓同警隊高層傾偈時，都有問現實係咪好似電影中咁多爭鬥，答案梗係唔係啦！高層們都話佢哋合作無間，大家好warm嘅，升職接班都有制度監管，點會有權力鬥爭呢？況且平日佢哋工作都好忙，無乜機會親自上前線，所以大家睇完戲過下癮就算，唔好當真喇。
講返個比賽，得獎的微電影同四格漫畫非常高質，其中大專組冠軍作品嘅男主角甚至犧牲色相，除曬衫打格仔飾演「裸聊」受害人，睇到鄭晴「紅都面曬」！24位得獎青少年獲選為滅罪大使，八月有機會到荷蘭交流，參觀國際刑警總部，盧Sir鼓勵各滅罪大使多與家人和朋友分享滅罪經驗，又預祝佢哋享受旅程。恒生銀行副董事長兼行政總裁李慧敏就話，從參加者創意無限嘅作品中，睇到新一代對社會有承擔和責任感。
