圖：「社區互惠銀行」計劃社區互惠資源中心尋日正式開幕 /大公報記者張琪攝
「天生我才必有用」，基層弱勢家庭都唔例外，仲完美詮釋咗「高手在民間」。香港聖公會麥理浩夫人中心喺2010年起就推出「社區互惠銀行」計劃，發掘基層市民的潛在才能，唔係好似傳統銀行咁「存入錢」，而係鼓勵佢哋「存入才能」，實現助人自助，真正嘅開心些牙（share）。位於葵青區的「社區互惠銀行」計劃社區互惠資源中心尋日正式開幕，勞工及福利局局長張建宗及中心捐助人周大福慈善基金主席鄭家成都有出席，鄭家成仲讚話「呢間銀行係全港最多愛心儲備的銀行，希望業務蒸蒸日上，開多啲分店！」
張建宗喺致辭時都話，呢個計劃唔係單向性資助基層弱勢家庭咁簡單，仲喺過程中鼓勵佢哋自力更生，挖掘自己潛能，提升自信心，對抗生活逆境。佢仲講笑咁講，「社區互惠銀行」好好表現，話「業績」好先可以叫大金主鄭家成再畀多啲資助。不過，張建宗都仲不忘即場推銷「低收入在職家庭津貼」，透露已經有逾2600個家庭成功獲批津貼，叫有需要家庭快啲申請！鄭晴覺得，張局長真係好勤力，連出席活動都仲記得推銷下政府惠民措施，唔畀個「like」你都幾難啊！
