圖：民記四老把握機會，以網絡直播向網民道別

　　好快譚耀宗、曾鈺成、葉國謙、陳鑑林已經講咗唔再參選嘅民建聯四大元老就要功成身退，相信好多讀者都同鄭晴一樣，好唔捨得佢哋。四老昨晚把握機會，在立法會以 「告別議會……前」為題作網絡直播，向網民道別。

　　唔知係唔係「無官一身輕」，四人都顯得特別輕鬆，被稱為「冷面笑匠」嘅譚sir更將功力發揮到十足，笑言以後唔使再開會，逢禮拜三可以四個人約埋開枱，一邊打麻將，一邊睇議會直播，見到有問題就通過WhatsApp提點班後生。嘩，譚sir主動提出打麻將，莫非係「賭神」？點知佢即刻擺擺手話，自己打牌水平麻麻，又唔識計數，真係打，可能會變咗 「魚腩」。

　　曾主席話，打牌無得計，分分鐘 「盲拳打死老師傅」，但佢話，選舉就無得靠運，真是要靠勤力啦。曾主席又順勢想當年，話自己1995年參選立法局嗰陣時，「乜都唔識，揸住咪都唔識嗌」，又自爆當初同譚sir幾個次次都倒瀉籮蟹，仲成日畀記者笑，而家嘅後生叻好多喔。

　　譚sir仲藉機向曾主席大呻近年所受的「拉布」之苦，話而家議會一日到黑「拉布」，「泛民」一個人打鐘，建制就要35個人坐定定，一日十個鐘，真係坐到個pat pat又㷫，個心又㷫。佢仲建議秘書處要改善下伙食，提供啲清涼嘅食物，否則口氣都大埋。