美國情侶多次潛入多個亞洲城市嘅鐵路系統塗鴉

　　唔知大家搭港鐵嗰陣，有無留意到列車車身有塗鴉呢？日前「The Grifters」上載咗一段最新短片，曾經多次潛入多個亞洲城市鐵路系統塗鴉嘅美國情侶Ether 同Utah，今次就塗到嚟香港。佢哋首先深夜喺九龍灣車廠外徘徊，之後就以 「迅雷不及掩耳」嘅方式剪爛防盜鐵絲網再爬入去。佢哋之後搵到目標列車，隨即熟練地噴上 「CRIME TIME」嘅字眼。當有港鐵職員發現後，佢哋就立即逃走。不過片段去到尾聲，就變咗日頭，佢哋竟然又成功潛入柴灣車廠繼續塗鴉，事後仲喺筲箕灣站同鰂魚涌站影低自己嘅 「大作」，在場市民都竟然完全唔覺車身有咩特別。

　　嘩嘩嘩！鄭晴到底係咪睇緊港產片呀？港鐵車廠好似 「無掩雞籠」咁，輕輕鬆鬆就可以入到去，如果佢哋唔係塗鴉，而係做其他嘢，咁就大件事啦！港鐵發言人話，片段中涉及九龍灣車廠同埋柴灣車廠，分別發生係2011 年至2015年期間，已經就事件報警，呼籲市民唔好以身試法喎！其實，港鐵過往都出現列車被塗鴉嘅事件，例如2013年6月，港鐵東鐵線沙田站其中一個車卡就畀人塗鴉。鄭晴喺度都呼籲各位，唔好以身試法！唔好以身試法！唔好以身試法！（真係好重要，所以鄭晴要講三次！）