圖：議員趁臨別在即，尋日喺立法會宴會廳舉辦茶敘，向四年嚟一直忙於處理議會事務嘅立法會秘書處同事致謝。梁君彥仲自掏腰包，買咗兩隻金豬嚟贈興添/大公報記者黃洋港攝

　　今屆立法會會期剩番唔夠一個禮拜，議員趁臨別在即，尋日喺立法會宴會廳舉辦茶敘，向四年嚟一直忙於處理議會事務嘅立法會秘書處同事致謝。立法會主席曾鈺成、內會主席梁君彥、副主席馬逢國等議員都有出席，梁君彥仲自掏腰包，買咗兩隻金豬嚟贈興添。

　　秘書處職員畀黃毓民「累死」

　　立法會「拉布」浪接浪，身為「拉布」常客之一嘅黃毓民(癲狗)尋日都有現身，同其他議員一齊切燒豬。儀式開始之前，曾主席就同黃毓民講：「你一定要多謝秘書處喇！要應付你一個人嘅工作量等於其他議員嘅總和！」身邊嘅梁君彥亦都笑埋一份，仲講笑咁話叫黃毓民好似隻燒豬咁瞓喺枱面，畀秘書處職員好似燒豬咁切喎！

　　秘書長陳維安就發言多謝議員對秘書處同事嘅款待，話呢四年嚟大家都辛苦喇，希望所有同事可以趁暑假陪伴家人、好好休息吓，到10月個陣就歡迎新一屆立法會議員歸位。

　　可能果兩隻燒豬真係好吸引，當切燒豬儀式一完成，經民聯林健鋒未等到切豬師傅動手，自己就先拎起把金刀，喺燒豬嘅pat pat度切咗一小塊肉，「明張目膽」咁「偷食」，仲向在場記者舉起手指公添！鄭晴睇到真係「紅都面曬」啊！