圖：葛珮帆拍咗條片上載 facebo ok，教市民點樣 DIY「天然香茅驅蚊膏」
宣傳片都有講夏天為大地帶嚟雨水，而家仲要加多句夏天為大家帶嚟蚊患。周街都係防蚊產品，蚊怕水、驅蚊膏、防蚊貼……樣樣都話自己係殺蚊死，但係當中亦都可能包含好多化學物成分，隨時要同啲蚊同歸於盡，鄭晴真係好想問下全能嘅facebook大神應該點揀。咁啱呢，又被鄭晴我見到民建聯立法會議員葛珮帆（EQ）近日就拍咗條片上載 facebook，教市民點樣DIY 「天然香茅驅蚊膏」，仲要係天然無害，防蚊又防蠓，真係殺蚊於無形，好似華安話齋真係家居旅行必備良藥！
唔講唔知，自製防蚊膏原來好簡單，只係需要準備肌底油（提子油）同埋蜜蠟五克，放喺玻璃器皿內 「加熱」，直到啲蠟全部溶解之後，再加入茶樹精油兩滴、香茅精油五滴，攪埋一堆之後，就可以倒入啲樽仔入面，凝固成膏狀之後就可以用得，得咗！EQ同鄭晴講，「香茅」係著名嘅驅蚊神器，畀啲蚊蟲「親吻」完就可以止痕消腫，味道芬香，成分仲絕對天然。鄭晴開心大發現，呢啲驅蚊膏嘅成本唔高，對 「愛靚又愛命」嘅人嚟講，絕對係一件 「法寶」！
