圖：曾鈺成尋晚作東，喺立會宴會廳搞咗個四年一度嘅 「惜別晚宴」，CY同各位司局長都有嚟同議員們食番餐 大公報記者何嘉駿攝

　　今屆立法會會期將於呢個星期六（十六日零時）正式結束。立法會主席曾鈺成尋晚作東，喺立會宴會廳搞咗個四年一度嘅 「惜別晚宴」，行政長官梁振英（CY ）同各位司局長都有嚟同議員們食番餐。

　　曾鈺成就嚟卸下主席之位，今次係佢最後一次用呢個身份邀請議員同官員聚會，佢致辭回顧番咁多年議會生涯，就好感嘆咁話自己喺履行職務嘅時候都有好多缺失，對政府都製造咗啲麻煩，有失官員期望咁話，仲同官員道歉添，希望新一屆立法會議員同主席，可以幫行政立法關係開番個新局面。新民黨主席葉劉淑儀就特登送咗紮花、同一張寫住 「Goodbye and Goodluck」嘅手工卡賀曾主席 「榮休」。

　　曾主席話譚Sir好譚炳文

　　呢四年行政立法關係成日都畀人話愈來愈差，但尋晚嘅惜別晚宴依然好多人出席，連開八圍，連以往整日杯葛聚會嘅反對派都有14人出席，仲有議員拎支 「茅台」出嚟對飲，大家似乎都不計前嫌往事，但求對酒當歌。上次議員與傳媒同樂日已經上演咗一次 「我是歌手」，估唔到惜別晚宴，議員還是 「卡拉永遠ok」。

　　各黨派議員昨晚一齊上台唱歌，大合唱《朋友》、《獅子山下》，據講曾主席仲獨唱首本名曲《小李飛刀》，譚耀宗、梁美芬、涂謹申同單仲偕更組咗隊嶄新組合獻上一曲《舊歡如夢》，扭晒腰跳晒舞，笑到議員碌地，連主席都話譚Sir好譚炳文！

　　另外，鄭晴仲八到，坐喺CY隔籬的民記葛珮帆（EQ）席間同特首雞啄唔斷，到底講咩先？EQ就話，尋日朝早民建聯搞咗個創新科技圓桌會議，同CY講番會議內容啫，仲話香港發展經濟不止要靠創科，其他局都要配合，特首都好認同咁話。