曾主席（左）即興喺麵包上面寫「從心」同「明理」四個字
表明唔再競逐連任嘅立法會主席曾鈺成即將告別議會，佢之前同議員晚宴嘅時候 「忘盡心中情」，亦接受咗唔少傳媒訪問講下心事咁。早幾日曾主席仲帶咗港台節目主持人到立法會大樓五樓嘅空中花園，食住早餐咁傾偈。不過，一講到議會生態嘅轉 變 ， 曾主席就唔多高興喇，佢話以前議員次次開會都會好認真咁準備同組織發言，但係而家就有部分議員以道具或者動作吸引傳媒注意，仲話咁樣唔係佢欣賞嘅議會文化，大嘆議會生態 「今不如昔」添。
曾主席仲即興喺麵包上面寫 「從心」同 「明理」四個字。就嚟70 歲嘅佢引用孔子所言： 「從心所欲不逾矩」，即係話年屆70，可以做乜就做乜，不過都要明白，人其實任何時候都受某啲限制，唔可以逾矩，所以 「從心」同 「明理」，兩者難分先後。
