陳穎欣（左二）辦事處開幕，全家人都嚟撐場
工聯會 「小花」陳穎欣舊年打低民協 「大佬」馮檢基，成功當選深水埗區議員。她同立法會議員陳婉嫻（嫻姐）喺深水埗嘅聯合辦事處尋日終於開幕喇，好多重量級嘉賓包括公務員事務局局長張雲正、中聯辦社工部部長楊茂、立法會議員王國興同蔣麗芸等都有嚟道賀。
鄭晴喺現場仲見到小花 「全家總動員」，陳爸爸香港海關人員總會主席陳志光、媽媽同妹妹都有嚟十卜（support）。小花同鄭晴講，爸爸一開始好唔贊成佢參與地區工作，怕佢辛苦，叫佢不如留喺office嘆冷氣啦！不過，陳爸爸後來畀佢嘅堅持打動，即使當選之後少咗時間陪屋企人亦都無怨言，仲叫佢努力服務市民，小花話巧滾動好warm添。小花都好有正能量咁話，未來會展開十樣工作，包括完善社區休憩設施、改善屋邨水壓不足、監察工程進度等，希望可以 「戰勝仇恨、化解悲觀」，將希望散播至社區每一個角落。
而以前係海關關長嘅張雲正，就話今日特別嚟撐老朋友個女，又大讚2012年第一次見到陳穎欣，已經feel到佢對社區服務好有興趣，希望將來社會有多啲年輕人好似穎欣咁。
