圖：李慧琼、陳鑑林同一班民記後生區議員，喺坪石邨商場平台上演街頭版「民記好聲音」，落力唱好香港\大公報記者林良堅攝

　　唔講唔知，尋日係民建聯24歲生日，不過，民記生日唔唱生日歌，而係發表新歌《放下對立，走出困 局》 。民建 聯 主席 李慧琼（ Starry）更同埋即將卸任立法會議員嘅陳鑑林，仲有柯創盛、顏汶羽、蕭嘉怡、陳俊傑一班黨內嘅後生區議員，喺坪石邨商場平台上演街頭版 「民記好聲音」，熱烈地彈琴熱烈地唱。

　　Starry讚鑑林「三得」

　　都話音樂係最好嘅溝通方法， Starry就同鄭晴話，而家社會 「好對立」，佢哋想要 「憑歌寄意」，用音樂嚟緩和下社會嘅緊張氣氛。佢笑笑口話民記想擺多啲 「音樂街站」，但未必有咁多 「歌王」可以出場，要努力提升大家嘅歌唱水平先。不過鄭晴就覺得，真係唔唱唔知歌喉好，估唔到 「民家班」都唱得幾句！

　　一眾民記後輩尋日都藉機向喺地區服務咗28年嘅陳鑑林致意。李慧琼大讚鑑林有 「三得」，第一係地區工作了得，喺歷次選舉入面一直都係常勝將軍；第二係 「剪布」了得，今年三月喺立法會審議追加高鐵撥款中果斷 「剪布」，高鐵就唔使爛尾喇；第三就係培養新人了得，鑑林咁多年都好積極咁培育新人，仔仔陳俊傑亦都喺鑑林薰陶之下加入咗民建聯，投身地區服務。

　　咁啱今次出場嘅新歌就係由陳俊傑作詞編曲 「一腳踢」。傑仔同鄭晴說，為咗呢首新歌花咗幾個月時間，仲走咗去台灣搵靈感添，好在最後出來嘅效果都幾滿意。但鄭晴發現歌中有個別高音嘅地方唔係個個都handle到，傑仔就話，佢早已就幫唱唔到高音嘅黨友諗定辦法，就係合唱嘅時候分高低音兩部分，畀大家自己執生。