圖：Formula E今年12月2至3日重臨香江
電動方程式賽車（Formula E）今年12月2至3日重臨香江。一連兩日賽事，除咗有得睇電動方程式喺中環海濱、龍和道奔馳外，今年主辦方仲大搞新花款！有亞洲首次嘅無人駕駛全自動電動車示範賽，以及賽道跑步賽。想睇無人車掟彎，抑或自己落場「爬頭」跑贏對手一條街，同樣夠過癮刺激！
看台門票賣剩三成
Formula E香港站主辦單位尋日公布賽事詳情稱，今年活動特別加入創新科技同運動元素，除了無人駕駛電動賽車Roborace 2017、賽道跑外，今年畀兩萬名公眾免費入場嘅E-Village區，將會分為「探索區」、「遊戲區」、「美饌區」同埋「充電區」，當中場內設賽事模擬器擂台，畀入場人士一試身手。同場仲有Audi車廠展示配置電動交通藍圖裝置嘅概念車款。想知有幾巴閉？當然要入去近距離望望。
鄭晴聽香港電動方程式行政總裁方仁傑講，早前派發嘅兩萬張E-Village免費門券，足足有10萬人網上登記撲飛，反應熱烈。蘇州過後無艇搭？1.4萬張主看台門票，家下都賣咗七成，想入場嘅，有買趁早！
鄭晴
