顏汶羽（左）不時響社交網站分享同太太嘅生活點滴。
大公網1月3日訊（記者 龔學鳴）：人生有幾多個十年？唔經唔覺，青年民建聯主席顏汶羽今年已經踏入從政第十年。新年伊始，顏汶羽響自己嘅Facebook專頁分享自己從政嘅原因同埋新年願望。佢話，當初自己入行嘅原因，係希望做好政策，亦唔會忘記研究工作同地區工作係不可或缺、不能切割，仲寫咗句「攀登高峰 是敢於歷險！」嚟勉勵自己添。
顏汶羽話，自己今年有四個願望。第一係善用自己嘅研究能力，搵出社會問題原因，對症下藥，建言立諫，做好政策研究工作；第二係多啲落區聽意見；第三係希望青年民建聯做好搭建平台的角色，令更多年輕人有機會參政議政，同埋認識民建聯真正嘅一面。
顏汶羽話，從政者從來都係工作先行，忽略家庭。雖然自己有家人默默支持，但都知道佢哋唔會淨係想響電視和報章上見到自己，或者淨係同電話溝通。所以，佢嘅最後一個願望，係希望學業、工作同生活要有更好嘅平衡。希望顏汶羽能夠願望成真，新一年家庭事業兩得意啦。
