大公網1月3日訊（記者 龔學鳴）：陪伴唔少港人成長嘅著名漫畫《老夫子》，作家王家禧逝世。行政長官梁振英響Facebook發帖，對王家禧家人表示慰問：「王先生的『老夫子』是香港一代傳奇，願王先生安息」。梁振英亦都憶起細個嘅成長經歷，話試過去理髮店睇漫畫書。
梁振英話，細個因為家境問題，買學校教科書都有困難，亦都冇餘錢買漫畫書，唯一有機會睇漫畫書就係去理髮店。佢話，當時《老夫子》漫畫最受大人同小朋友歡迎，所以老闆就大量供應招徠客人；而漫畫中嘅角色—老夫子、秦先生、大番薯，仲經常被小朋友用嚟起「花名」。
佢又話，私人會所中國會嘅電梯經常掛上《老夫子》漫畫，自己每次到中國會吃飯都會仔細欣賞，令佢記起小時候嘅理髮店。
商務及經濟發展局局長蘇錦樑亦都對王家禧離世表示深切哀悼。佢讚揚王家禧響60年代創作《老夫子》漫畫，透過獨特繪畫風格、簡單而詼諧嘅故事，展現香港社會唔同年代嘅生活面貌，反映人生百態。而各個家喻戶曉嘅漫畫人物，亦都陪伴香港人成長，深受唔同世代及年齡層讀者喜愛。
