大家覺得陸頌雄似唔似發哥呢？
大公網4月1日訊 近期社交網站除咗有好多謝霆鋒入廚嘅貼文，仲有好多人鍾意貼出「你最神似那一位電影明星」嘅貼文。最近有一個網站，俾網民將大頭照上載，再分析相片最似邊一位電影明星。不過大家鍾意玩呢個程式嘅主因，似乎唔係真係想知邊位明星同自己似樣，而係嗰位明星好多時同上載人根本唔似樣，發貼文只係為咗同大家開玩笑。
相信都無咩人會噓你嘅。
好似工聯會陸頌雄同民主黨嘅尹兆堅，今日就不約而同，喺社交網站貼出自己似邊位明星嘅圖片。陸頌雄就俾程式話佢最似周潤發，佢仲喺貼文話「周末輕鬆一下玩嚇先…….竟然系發哥。四月一日，你懂的。」算係順應一下愚人節嘅習俗。
而尹兆堅就搵來陳年舊相，相中仲係好瘦嘅佢，同而家圓圓的臉似乎就有啲分別。經程式分析，竟然話佢似黎明！似乎阿尹自己都覺得有啲離譜，所以講到明係玩報復，仲話「咪噓呀，我都忍左你地個幾禮拜啦係咪先。」阿尹睇落唔多滿意大家用呢類貼文喺網上洗版嘅行為，其實都係叫大家唔好噓佢姐。大家又覺得佢地兩位似唔似明星呢？
