圖：何君堯揀咗上屆民建聯譚耀宗位於六樓嘅辦公室，覺得風水好好
要數新聞多多嘅「新丁」立法會議員，「熱血公民」鄭松泰應該係其中之一。事關佢因為舊年倒插國旗而被建制派動議譴責，立法會需要成立調查委員會跟進。作為調查委員會副主席、同樣係「新丁」議員嘅何君堯（Junius）尋日舉行新春傳媒茶敘嘅時候就話，自己要同鄭松泰保持距離，可能要等調查委員會完成工作之後先可以傾偈喎。
Junius又話，自己上任之前要揀立法會議員辦公室，當時有十樓、八樓同六樓三個選擇。當佢知道揀10樓要同鄭松泰共事，就打消念頭，講笑話要同佢「保持安全距離」；至於八樓，Junius就覺得位置唔太好，結果就揀咗上屆民建聯譚耀宗位於六樓嘅辦公室。Junius話，譚耀宗做到咁多屆立法會議員，仕途咁好，相信呢個辦公室嘅風水一定好好。
